मुंबई : सलग दुसऱ्या वर्षी महाराष्ट्र केसरी किताब मिळवलेल्या जळगावच्या विजय चौधरी यांची राज्य पोलीस दलात उपअधीक्षक/सहायक पोलीस आयुक्त या पदावर नियुक्ती करण्यात आली आहे. मुख्यमंत्री देवेंद्र फडणवीस यांच्या हस्ते वर्षा निवासस्थानी चौधरी यांना नियुक्तिपत्र देऊन त्यांचा सत्कार करण्यात आला.
गेल्या वर्षी नागपूर येथे झालेल्या स्पर्धेत जळगावचे कुस्तीपटू विजय चौधरी यांनी सलग दुसऱ्या वर्षी ‘महाराष्ट्र केसरी’ हा मानाचा किताब पटकावला होता. ‘महाराष्ट्र केसरी विजेत्याला पोलीस दलात नोकरी देऊन त्यांचा सन्मान करण्यात येईल,’ अशी घोषणा मुख्यमंत्री देवेंद्र फडणवीस यांनी केली होती. महाराष्ट्रात कुस्तीला प्राधान्य देऊन खेळाडूंना जी काही मदत लागेल, ती राज्य सरकार करणार असल्याचे आश्वासन मुख्यमंत्र्यांनी दिले होते. या आश्वासनाची पूर्ती करून चौधरी यांची राज्य पोलीस दलात उपअधीक्षक पदावर नियुक्ती करण्यात आली आहे.
